الخيل والتبوريدة
في بلادي عادة
ورثناها من جيل لجيل
في مواسم بلادي
مع الحباب
يحلى الليل...
نسهروا...ونلعبوا
يجمعنا براد اتاي
شوف الصينية
مدورة بها كيسان بلار
من فرحتها تضحك
وبرادها بارز...
تقول وزير الحضار
النخوة ...والشرف...
ضاوي كيف شمس النهار
صينيتنا مشهورة
وفيها تنظموا أشعار...وأشعار
صينة بلادي...
ديما واجدة موجودة
ترحب بالقريب
وأهل الدار
وتفرح بالغريب
وكل من هو جار
وحنا ...جيرانا كثار
الحمد لله ...الحمدلله
بلادي زينة...بلاد الخير والزهر والنوار
بلاد الاؤلياء..والشرفة لحرار
التاريخ علينا شاهد
مانخافوا عدو...ولاترهبنا النار
مجدنا شامخ...طود
ما يتحنى ولا يناهر
احنا مغاربة ونعشقوا الخيل
بالتبوريدة تعرفنا
في كل الأقطار....
نعشقوا السرج الذهبية
اصفر ولا احمر ولااخضر
يخطف الأنفاس....زاهي
كيف شمس العشية
الخيل عندنا مشرفة...
مقامها محفوظ
مقام الصفى والنية
والخيال عندنا قيد...وسلطان
يخرج ويدخل بالهدية
لباسو جديد حر...
تشوفو من بعيد ...تقول ضرغام
لباس لجدود
الجلابة بزوية...ويعنقهاالسلهام...
والبلغة فاسية
والخنجر فضة يزين لحزام
تخرج سربة ورها سربة
ينمظها قيدهم العلام
هذيك شمالية..والاخرى وجدية
وذيك دكالية...وهذي صحراوية
من كل جهة ...وجهة...
وجهات بلادي....غالية
سمع صوت البارود...والفرحة
وسمع صوت التزغريدة...حرة
في السما عالية
في مواسم بلادي
الخيل والتبوريدة عادة
من موقع دواوين